Tensione në Kuvend, opozita bllokon foltoren dhe ndërhyn Garda

Seanca plenare në Kuvend ka nisur me tensione të ashpra, ndërsa kryetari Niko Peleshi prezantonte rendin e ditës dhe hapte punimet parlamentare. Deputetët e Partisë Demokratike kanë krijuar kakofoni brenda sallës duke goditur tavolinat me duar dhe duke kundërshtuar zhvillimin normal të seancës.

Opozita ka ngritur pankarta në mbështetje të protestës së studentëve që janë mbajtur në dy javët e fundit, duke shprehur gjithashtu pakënaqësinë ndaj dhunës policore ndaj të rinjve në protesta. Pasi kanë bllokuar foltoren e Kuvendit për të penguar punimet, efektivët e Gardës së Republikës janë pozicionuar përballë tyre duke krijuar një kordon në sallë.