Protesta e 55-të për Zvërnecin — qytetarët kërkojnë qeveri tranzitore
Aktivistët kërkojnë ndryshime në sistemin politik dhe largimin e Edi Ramës
TIRANË — Ka vijuar këtë të premte në Tiranë protesta e 55-të kundër investimit në zonën e Zvërnecit. Aktivistë të shoqërisë civile dhe qytetarë u mblodhën fillimisht në sheshin “Skënderbej”, ku mbajtën pankarta dhe parulla me kërkesa politike, përfshirë thirrje për largimin e kryeministrit Edi Rama dhe ndryshime në sistemin politik.
Protestuesit përsëritën kërkesën për krijimin e një qeverie tranzitore, me argumentin se kjo do të mundësonte, sipas tyre, rikthimin e funksionimit demokratik të institucioneve. Kërkesat e protestuesve mbeten ndryshimi i ligjit zgjedhor, shfuqizimi i ligjit për investitorët strategjikë, kundërshtimi i Paketës së Maleve, si dhe ndryshimeve që lidhen me zonat e mbrojtura dhe trashëgiminë kulturore.
Protesta është organizuar prej 55 ditësh, me fokus kryesor kundërshtimin e investimeve të planifikuara në zonën e Zvërnecit. Në fjalën e rastit, protestuesit i’u përgjigjën Kryeministrit Rama lidhur me dokumentin e hartuar prej tij, të emërtuar “Besa”, me fokus përmirësimin e qeverisjes së vendit.
Burim: Zëri
— Redaksia ZHURMA