Gjykimi në mungesë ndaj Milan Radoiçiqit për krime lufte nis më 21 dhjetor

GJAKOVË — Gjykata Themelore në Prishtinë ka caktuar datën 21 dhjetor 2026, në orën 09:30, për mbajtjen e seancës fillestare në procesin gjyqësor në mungesë ndaj Milan Radoiçiqit dhe 19 të pandehurve të tjerë, të cilët akuzohen për krime lufte kundër popullsisë civile dhe vrasjen e 107 civilëve në Komunën e Gjakovës.

Siç raportoi Zhurma më 10 tetor 2026, Milan Radoiçiq, i cili kërkohet nga Interpoli për sulmin në Banjskë ku dyshohet se ishte organizator i grupit, u pa më parë në një tubim parazgjedhor të SNS-së në Kragujevc pranë Danilo Vuçiqit.

Sipas njoftimit nga Gjykata Themelore në Prishtinë, procedura do të zhvillohet në mungesë me propozim të Prokurorisë Speciale të Republikës së Kosovës, pasi të pandehurit nuk kanë qenë të arritshëm për organet e rendit deri në momentin e ngritjes së aktakuzës. Trupi gjykues në këtë çështje do të drejtohet nga gjyqtari Leon Përlaska, ndërsa institucioni gjyqësor u ka bërë thirrje publike të akuzuarve që të paraqiten dhe të dorëzohen. Gjithashtu, Gjykata u ka bërë apel të gjithë qytetarëve që kanë informacione për vendndodhjen e tyre që t'i raportojnë ato në Policinë e Kosovës ose te organet e tjera kompetente. Më parë, më 27 mars 2025, Gjykata Themelore në Prishtinë kishte lëshuar urdhërarrest ndaj 20 të pandehurve për krime lufte, ndërsa Prokuroria Speciale e ngriti aktakuzën më 6 gusht 2026.

Sipas aktakuzës së Prokurorisë Speciale, gjatë viteve 1998-1999, Milovan Kovaçevic në cilësinë e shefit të Sekretariatit të Punëve të Brendshme (SUP) në Gjakovë, Radomir Çoliq si komandant i njësive të Policisë së Posaçme (PJP), dhe Milosh Doshan si komandant i Brigadës së 52-të të Artilerisë Raketore, së bashku me pjesëtarët e këtyre njësive Predrag Ristiq, Sërgjan Kërstiq, Ljubisha Orloviq, Zhivko Stevanoviq, Sllavisha Stevanoviq, Ljubisha Dojçinoviq, Zoran Radunoviq, Dragan Goluboviq, Çedomir Bojkoviq, Vladan Bojkoviq, Radoje Bojkoviq, Ratomir Ristiq, Ljiljana Ristiq, Milorad Shçepanoviq, Milan Radoiçiq, Srdjan Gaçeviq dhe Tomislav Arsiq, akuzohen se kanë marrë pjesë në një operacion të gjerë ushtarako-policor. Prokuroria bëri me dije se gjatë këtij operacioni, të pandehurit kishin ndarë gratë dhe fëmijët nga burrat. Grave u janë marrë paratë, stolitë e arit dhe sendet e tjera me vlerë, shtëpitë u janë djegur, ndërsa burrat janë ekzekutuar në shtëpitë e tyre, në oborre dhe te lokacioni i njohur si Ura e Taliqit.

Seanca fillestare e shqyrtimit gjyqësor është caktuar të mbahet më 21 dhjetor 2026, duke filluar nga ora 09:30, ku do të nisë zyrtarisht gjykimi në mungesë ndaj të gjithë të akuzuarve.