Uji me fekale helmoi Gostivarin — paraburgosen 3 drejtues të 'Komunalec'
Ministri i Brendshëm konfirmoi se janë shoqëruar dhjetëra persona, ndërsa tre drejtues të ujësjellësit 'Komunalec' ndodhen në paraburgim.
GOSTIVAR — Prokuroria Publike po grumbullon provat për helmimin e mijëra banorëve të Gostivarit nga uji i pijshëm. Organi i akuzës konfirmoi se po ndërmerr të gjitha veprimet e nevojshme hetimore, ndonëse mbetet i rezervuar për të dhënë detaje rreth rrjedhës së mëtejshme të hetimit.
Ministri i Brendshëm, Pançe Toshkovski, njoftoi se dhjetëra persona janë marrë në bisedë informative lidhur me këtë rast. Ai theksoi se po hetohen të gjitha pistat e mundshme në koordinim me prokurorinë, dhe se opinioni do të informohet sapo të ketë të dhëna të reja.
Për incidentin janë paraburgosur tre drejtues të ndërmarrjes publike “Komunalec”: Artana Asani, Vadedin Dervishi dhe Leon Nuredini. Ata akuzohen se kanë vendosur pompa në ujësjellës me qëllim që të rrisin shtypjen, por pompat kanë injektuar ujë të ndotur me fekale.
Ndotja dyshohet se ka ndodhur midis 25 qershorit dhe 16 korrikut. Gjatë kësaj periudhe, Qendra për Shëndet Publik kishte informuar dy herë autoritetet se uji ishte i rregullt, megjithëse në qytet u regjistruan shumë pacientë të rinj në Gostivar me simptoma helmimi.
Koalicioni VLEN kërkon gjithashtu hetime për projektin zviceran “SECO 2” me vlerë mbi 7 milionë euro për gypat e ujit, i nisur në vitin 2020. Kryetari i atëhershëm, Arben Taravari, pati deklaruar se ky projekt do ta zgjidhte problemin për 100 vitet e ardhshme.
Burim: Alsat-M
— Redaksia ZHURMA