Çfarë shërbimesh ofron Prishtina falas në Gërmi çdo të shtunë?
Ekipi i urgjencës mobile do të ofrojë matje të shtypjes së gjakut dhe aktivitete fizike për të gjitha grupmoshat.
PRISHTINË — Komuna e Prishtinës ka nisur shërbime falas shëndetësore në Parkun e Gërmisë, të cilat do të zhvillohen çdo të shtunë nga ora 09:00. Një ekip i urgjencës mobile, i përbërë nga mjek dhe staf teknik, do të ofrojë matje të shtypjes së gjakut dhe treguesve të tjerë bazikë shëndetësorë.
Iniciativa është pjesë e planit trevjeçar për avancimin e kujdesit shëndetësor parësor dhe promovimin e shëndetit publik. Në njoftimin e komunës thuhet se Parku i Gërmisë është përfshirë në programin formal të qeverisjes komunale si një iniciativë konkrete për përmirësimin e shëndetit fizik dhe mendor të qytetarëve.
Bashkëpunimi mbështetet në praktikat më të mira ndërkombëtare, përfshirë modelin e National Health Service. Çdo të shtunë organizohen ecje dhe vrapime rekreative në distanca prej 2 dhe 5 kilometrash. Pjesëmarrja është falas, pa karakter garues dhe e hapur për të gjitha grupmoshat, pavarësisht nivelit të përgatitjes fizike.
Burim: Zëri
— Redaksia ZHURMA