Pse qytetarët e quajnë barrë të rëndë taksën e re të Prishtinës për hyrje me veturë?

PRISHTINË — Komuna e Prishtinës ka nisur procedurat përfundimtare për vendosjen e një takse prej 10 eurosh për çdo qytetar jorezident që hyn me automjet në qendër të kryeqytetit. Nismës i është shtuar edhe një tarifë prej 1 euro për natë akomodimi për vizitorët që qëndrojnë pa automjet.

Kryeqyteti e justifikon masën si përpjekje për të reduktuar trafikun dhe ndotjen nga makinat që vijnë nga qytetet e tjera. Mirëpo qytetarët e shohin propozimin si barrë të padrejtë, veçanërisht ata që udhëtojnë çdo ditë për nevoja të domosdoshme.

"Mezi s'kemi prit këta qytetarë me qenë të lirë... këto janë norma të cilat nuk besoj që mund të realizohen, edhe në qoftë se i futi në ligj, Gjykata ka me ua kontestu prapë", tha një qytetar për Telegrafi. Tjetri shtoi: "Nuk është e duhur ajo, 10 euro, se edhe ashtu jemi të ngarkuar. Rrogat janë shumë të vogla." Një qytetare theksoi se "të ardhurat janë në Kosovë, nuk janë shumë të mira — për nja 40-50% e më shumë ndoshta."

Kritikët paralajmërojnë gjithashtu se masa mund të shkaktojë "luftë tarifash" me komunat fqinje dhe se nuk ka bazë ligjore të qartë. Pagesa parashihet të bëhet në pika të autorizuara hyrëse ose përmes sistemeve elektronike.

Burim: Telegrafi
— Redaksia ZHURMA