Osmani: Shkarkimet për rastin e Arlinda Zekajt nuk mjaftojnë

Ish-presidentja e Kosovës ka reaguar pas vrasjes së Arlinda Zekajt, e cila u vra më 25 tetor në Vitomiricë të Pejës nga kunari i saj, duke kërkuar llogaridhënie institucionale. Përmes një postimi në rrjetin social Facebook, ajo ka theksuar se masat administrative si shkarkimet dhe dorëheqjet nuk mjaftojnë për të adresuar dështimet në mbrojtjen e viktimës, duke shtuar se «SHTETI E LA NË DUART E VDEKJES».

Ajo ka kërkuar që përgjegjësia të mos kufizohet vetëm në këtë nivel, por të përfshijë edhe ndjekjen penale për çdo zyrtar që nuk ka vepruar. «Për çdo zyrtar që refuzoi ta mbronte, duhet të ketë edhe përgjegjësi penale», ka deklaruar ajo, duke bërë thirrje për drejtësi dhe duke e përmbyllur mesazhin me thirrjen «DREJTËSI. PËRGJEGJËSI. BURG!».

Ndërkohë, Inspektorati Policor i Kosovës ka nisur veprimet hetimore dhe verifikuese për të shqyrtuar mënyrën se si Policia e Kosovës i ka trajtuar rastet e raportuara më parë nga e ndjera. Rasti ka ngjallur edhe reagime të tjera publike dhe institucionale në Kuvend, ku deputetët kanë kërkuar veprime konkrete për parandalimin e dhunës.