Bordi i Transparencës ndryshon çmimet e naftës dhe benzinës

Bordi i Transparencës ka përcaktuar çmimet e reja të shitjes për naftën dhe benzinën në vend, pas mbledhjes së zhvilluar këtë të enjte, më 29 tetor. Sipas vendimit të ri, çmimi maksimal i shitjes me pakicë për naftën (gazoil) zbret nga 213 lekë për litër në 212 lekë për litër, ndërsa çmimi i shitjes me shumicë nuk duhet të kalojë 200 lekë për litër.

Ulja më e ndjeshme është regjistruar te benzina, e cila ulet me 9 lekë për litër në raport me kufijtë e mëparshëm. Çmimi maksimal i shitjes me pakicë për benzinën është caktuar në 181 lekë për litër, nga 190 lekë që ishte më parë, kurse çmimi i shitjes me shumicë do të jetë 169 lekë për litër.

Këto çmime hynë në fuqi në orën 15:00 dhe do të mbeten të vlefshme deri në mbledhjen e radhës së bordit. Vendimi është marrë në kuadër të situatës së veçantë të shpallur në tregun e hidrokarbureve, ndërsa operatorët janë paralajmëruar se shkeljet do të sjellin pezullim të aktivitetit. Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë janë angazhuar për mbrojtjen e konsumatorëve dhe ruajtjen e konkurrencës së ndershme.