Policia e Shtetit sekuestron 15 kg ar dhe diamante në Fier e Lushnjë

FIER — Policia e Shtetit ka finalizuar operacionin “Stolen Gold”, duke goditur një rrjet të trafikimit të sendeve me vlerë nga Italia dhe Greqia. Gjatë aksionit në Fier dhe Lushnjë, u sekuestruan bizhuteri, ar dhe orë që kapin vlerën e rreth 2 milionë eurove.

Në pranga ra 27-vjeçari D. S., banues në Kreshpan të Fierit, i cili dyshohet se siguronte sendet e vjedhura dhe i fuste ato kontrabandë. Gjithashtu, një 45-vjeçar i identifikuar si B. A. është shpallur në kërkim nën dyshimet për të njëjtën veprimtari kriminale.

Ky rrjet funksiononte duke furnizuar subjekte argjendarie me mallra të vjedhura dhe pa dokumentacion ligjor. Hetuesit kontrolluan banesat e të dyshuarve ku gjetën sasi të arit dhe argjendit, të cilat dyshohet se ishin përfituar nga vjedhjet e kryera jashtë territorit shqiptar.

Në kuadër të operacionit, u proceduan penalisht shtatë administratorë argjendarish që dyshohet se blinin këto sende. Ata janë D. H., E. Gj., dhe A. Sh. banues në Fier, si dhe M. S., A. K., B. B., dhe J. D. banues në Lushnjë.

Sasia e sekuestruar përfshin 15 kilogramë e 259 gramë ar, 4 kilogramë e 281 gramë argjend, 612 orë të markave të ndryshme dhe 13 varëse me gurë diamanti. Policia zbuloi dhe sekuestroi gjithashtu sende me vlerë artistike dhe kulturore, para në euro dhe lekë, si dhe fishekë arme gjahu.

Materialet procedurale i kaluan Prokurorisë së Fierit për veprime të mëtejshme ligjore. Ndërkohë, policia po vijon punën intensive për lokalizimin e bashkëpunëtorëve të tjerë të shpallur në kërkim dhe dokumentimin e plotë të këtij rrjeti.

Burim: Telegrafi
— Redaksia ZHURMA