Turma e Mirësisë që lufton bullizmin në TikTok

Rrjetet sociale shpesh përballen me kritika për shkak të përmbajtjeve negative dhe mizorisë ndaj përdoruesve. Për ta ndryshuar këtë situatë, specialisti i marketingut digjital nga Kansas City, Tyler Brickley, themeloi në vitin 2023 një kanal në TikTok të quajtur Kindness Mob ose Turma e Mirësisë. Ai shpjegon se kjo nismë shfrytëzon mekanizmat e ngacmimit në internet, si koordinimi dhe anonimiteti, për të bërë mirë përmes komenteve pozitive.

Një nga rastet e prekura nga kjo nismë është Laura Tigeleiro nga Staten Island i Nju-Jorkut, e cila vuan nga skleroza e shumëfishtë dhe përballej rregullisht me tallje për shkak të pamjes së syrit të saj. Pasi videot e saj u përfshinë nga ky kanal, ajo mori mbi 15 mijë komente dashamirëse dhe fitoi mjaftueshëm ndjekës dhe të ardhura nga TikTok për t'i blerë familjes një makinë të re. Sipas përllogaritjeve të Brickley-t, deri më acum janë organizuar rreth 350 ndërhyrje të tilla, ndërsa në një prej tyre mori pjesë edhe personazhi i famshëm Paris Hilton.

Profesor Nicholas Christakis nga Universiteti Yale vlerëson se ky shembull mbështetet në të ashtuquajturën teori të përhapjes shoqërore, ku sjelljet pozitive apo negative kalojnë te njerëzit e tjerë si një virus. Nisma gjithashtu ka ndihmuar persona të tjerë, si Renee Penick nga Ohajo, e cila mori mbështetje gjatë kohës që po kujdesej për bashkëshortin e saj në spital, apo një muzikante me emrin Nocturne, e cila tani po përgatitet të nisë një turne falë admiruesve të rinj.