Pse u arrestua kandidati i PDK-së gjatë rrënimit të pompës "Patroni"?
Qëndrim Kryeziu u shoqërua për moszbatim të urdhrave policor gjatë punimeve për ndërtimin e objektit të ri të MBPZHR-së.
Redaksia ZHURMA · · Përditësuar · 1 min lexim
PRISHTINË — Policia e Kosovës ka konfirmuar arrestimin e një personi gjatë punimeve për rrënimin e ish-pompës së derivateve “Patroni”, në hapësirën ku pritet të ndërtohet objekti i ri i Ministrisë së Bujqësisë, Pylltarisë dhe Zhvillimit Rural.
Zëdhënësi i Policisë për rajonin e Prishtinës, Enis Pllana, tha për Telegrafin se personi u shoqërua rreth orës 10:30 për “mos zbatim të urdhrave të zyrtarit policor, për largim nga vendi ku po zhvilloheshin punime.” Ai shtoi se veprimet janë ndërmarrë në koordinim me Prokurorin e Shtetit.
Sipas raportimeve në media, personi i arrestuar dyshohet të jetë Qëndrim Kryeziu, kandidat për deputet nga Partia Demokratike e Kosovës. Kjo nuk është konfirmuar zyrtarisht nga autoritetet.
Ministria e Bujqësisë ka njoftuar më herët se ka filluar faza e punimeve për rrënimin e objekteve ekzistuese.
Burim: Telegrafi
— Redaksia ZHURMA
