Kush janë pesë kandidatët në garë për Kryeprokuror të Shtetit?
Konkursi për Kryeprokuror të Shtetit pritet të hyjë në fazën e shqyrtimit, pas publikimit të emrave dhe sfidës ligjore të Blerim Isufajt.
PRISHTINË — Këshilli Prokurorial është në pritje të aplikacioneve me postë për Kryeprokuror të Shtetit, pasi afati i konkursit u mbyll më 10 qershor. Paneli vlerësues nuk është takuar ende, prandaj lista zyrtare e kandidatëve nuk ekziston.
Në mungesë të listës zyrtare, media kanë raportuar emrat e pesë prokurorëve që kanë konfirmuar aplikimin. Në mesin e tyre janë Naim Abazi, Atdhe Dema, Rafet Halimi, Shqipdon Fazliu dhe Zejnullah Gashi.
Naim Abazi, prokuror në Departamentin për Hetimin e Korrupsionit në Prokurorinë Speciale dhe ngritësi i aktakuzës për Banjskën, tha se sistemi ka nevojë për ndryshim të vërtetë. “Nuk jam këtu për pozicion, por sepse besoj që mund të bëj diferencë”, ka thënë Abazi, duke kërkuar një konkurs të ndershëm e të bazuar në meritë.
Atdhe Dema, aktualisht në departamentin për Hetimin e Terrorizmit, tha se vendimi për të kandiduar buron nga përkushtimi i tij shumëvjeçar ndaj sundimit të ligjit dhe pavarësisë së sistemit prokurorial. Ai theksoi se prioritetet e tij do të jenë forcimi i integritetit institucional, rritja e efikasitetit dhe lufta kundër krimit të organizuar e korrupsionit.
Përveç tyre, Rafet Halimi, prokuror në Departamentin për Hetimin e Korrupsionit dhe Krimit Financiar, dhe Shqipdon Fazliu, nga Zyra e Kryeprokurorit të Shtetit që ishte në garë edhe në ciklin e kaluar, janë po ashtu në garë. Zejnullah Gashi, Kryeprokuror i Prokurorisë Themelore në Prishtinë, konfirmoi aplikimin por shmangu komentet e mëtejshme derisa aplikacioni i tij të shqyrtohet nga KPK.
Procesi i zgjedhjes së Kryeprokurorit të Shtetit mbetet i ndërlikuar. Blerim Isufaj, Kryeprokuror i Prokurorisë Speciale i propozuar për këtë pozitë më 2022 por i pa dekretuar, ka paraqitur padi në Gjykatën Administrative për të pezulluar konkursin. Gjykata e refuzoi kërkesën, por Isufaj e ka bartur çështjen në Gjykatën e Apelit, e cila ende nuk ka marrë vendim.
Konkursi i ri për Kryeprokuror të Shtetit vjen katër vjet pas dështimit të atij paraprak, dhe ndërsa sfidohet ligjërisht, procesi mbetet një pikë kyçe për besueshmërinë e sistemit të drejtësisë në Kosovë.
Burim: Zëri
— Redaksia ZHURMA