Gjermania drejt zgjedhjes së presidentes së parë grua

Gjermania mund t'ia besojë për herë të parë presidencën një gruaje, ndërsa politikania bavareze Ilse Aigner pritet të jetë kandidatja e bllokut konservator të kancelarit Friedrich Merz dhe Partisë Social Demokrate (SPD). Emërimi i saj pritet të shpallet zyrtarisht të hënën, ndërsa Merz synon të informojë drejtuesit e CDU-së të dielën. Aktualisht, ajo është presidente e Parlamentit të Landit të Bavarisë dhe anëtare e Unionit Kristian Social (CSU), ndërsa më herët ka shërbyer edhe si ministre e Bujqësisë gjatë periudhës 2008–2013 në qeverinë e ish-kancelares Angela Merkel.

Kandidatura e saj ishte propozuar që në muajin prill nga kryeministri i Bavarisë, Markus Söder, kurse mbështetje kanë sinjalizuar edhe politikanë të SPD-së dhe të të Gjelbërve. Kryeministri i Brandenburgut, Dietmar Woidke, e cilësoi atë si «kandidaten perfekte», duke vlerësuar njohuritë e saj të thella për politikën gjermane. Presidenti aktual, Frank-Walter Steinmeier, mbyll mandatin e dytë pesëvjeçar në mars të vitit 2027 dhe nuk ka të drejtë të garojë përsëri, ndërsa pasardhësi i tij pritet të zgjidhet më 30 janar 2027. Ndonëse posti i presidentit në Gjermani ka kryesisht karakter ceremonial dhe kompetencat ekzekutive i takojnë kancelarit, zgjedhja e një gruaje në këtë detyrë do të shënonte një moment historik.