Trump konfirmon sulmet ndaj mbrojtjes ajrore në ishullin Keshm

Presidenti amerikan, Donald Trump, ka konfirmuar se forcat e vendit të tij kanë ndërmarrë sulme të kufizuara ajrore kundër një sistemi mbrojtës iranian në ishullin Keshm. Gjatë një prononcimi për gazetarët në Florida, ai deklaroi se operacioni ishte i vogël dhe se shkatërrimi i sistemit u arrit brenda një kohe të shkurtër, duke shtuar se «e shkatërruan për 15 minuta, ndoshta për pesë». Sipas tij, Uashingtoni mbetet në kontakt me Teheranin dhe se «ata, me dëshpërim, duan një marrëveshje».

Nga ana tjetër, mediat vendase në Iran raportuan se dy predha goditën zonën e Suzës, ndërsa agjencia shtetërore IRNA iu referua dëshmitarëve lokalë që dëgjuan një aeroplan mbi zonë. Mediat iraniane pretenduan gjithashtu se mbrojtja ajrore kishte shkatërruar një dron amerikan MQ-1 Predator mbi të njëjtin ishull. Fushata e nisur në fund të shkurtit nga SHBA-ja dhe Izraeli ka si qëllim kryesor që Iranit t'i pamundohet posedimi i armëve bërthamore.

Ishulli strategjik i Keshm shtrihet në hyrje të Ngushticës së Hormuzit, e cila paraqet një nga rrugët më kyçe detare botërore për transportin e energjisë. Gazeta The Wall Street Journal raporton se në këtë zonë ndodhen një bazë detare, një objekt nëntokësor për raketa dhe një impiant i madh për shkripëzimin e ujit. Ky ishull ka qenë më parë në shënjestër të luftimeve dhe zyrtarët amerikanë kanë diskutuar mundësinë e marrjes së kontrollit të tij.