Pse vrapimi në shirit dobëson muskujt stabilizues?
Eksperti i fitnesit Arbër Peci tregon pse 10 km në palestër nuk janë të barabarta me 10 km në natyrë.
PRISHTINË — Vrapimi në shirit aktivizon më pak muskujt stabilizues dhe e ngarkon trupin ndryshe nga vrapimi në natyrë, thotë eksperti i fitnesit Arbër Peci. Sipas tij, personat që vrapojnë vetëm në shirit shpesh ankohen se pas 3 kilometrash në natyrë u "këputen" këmbët.
Arsyeja qëndron në mekanikën e lëvizjes. Në natyrë, çdo hap kërkon forcë dhe aktivizon muskujt e pasmë të kofshës dhe të pasmet — "motorët" kryesorë. Në shirit, rripi i motorizuar tërheq këmbën mbrapa, kështu që makineria bën gjysmën e punës. Muskujt e pasmë angazhohen shumë pak dhe mbeten të pazhvilluar.
Peci thekson edhe një rrezik tjetër: sipërfaqja e rrafshët e shiritit bën që muskujt e vegjël stabilizues rreth kyçeve të këmbëve të dobësohen me kalimin e kohës. Kur këta stabilizues të dobët ballafaqohen me terren të pabarabartë, guraleca apo gropa, nuk e përballojnë ngarkesën e papritur — duke rritur rrezikun e ndrydhjeve dhe lëndimeve.
Peci nuk e kundërshton shiritin: "është fantastik kur bie shi, kur është ftohtë". Por për këmbë të forta dhe muskuj të zhvilluar në mënyrë të barabartë, rekomandon kombinimin e të dyjave.
Burim: Telegrafi
— Redaksia ZHURMA