Si e cilëson Fetoshi narrativën serbe për kërcënimin nga Kosova?

PRISHTINË — Drejtori i Institutit “Octopus”, Arben Fetoshi, ka komentuar analiza që e paraqesin Kosovën si faktor destabilizues në rajon, duke thënë se ato ndërtojnë narrativën e një “kërcënimi të rremë”.

Fetoshi thekson se pretendimet për “agresion të NATO-s” në të kaluarën dhe për “rrezik nga bashkëpunimi Kosovë–Shqipëri–Kroaci” janë pjesë e një kornize propagandistike që synon të devijojë vëmendjen nga realiteti në terren.

Ai kritikoi ashpër gazetarin e “Politika”, Dejan Spaloviq, duke thënë se analiza e tij për “militarizim të Kosovës” nuk ka bazë reale dhe shërben për qëllime politike. Sipas Fetoshit, forcimi i FSK-së, bashkëpunimet ndërkombëtare dhe rritja e buxhetit të mbrojtjes janë interpretuar në mënyrë të shtrembëruar si kërcënim për paqen.

Fetoshi shtoi se Kosova është shtet sovran, i konfirmuar nga opinioni këshillues i Gjykatës Ndërkombëtare të Drejtësisë, dhe se FSK-ja funksionon sipas standardeve të NATO-s. Ai e cilësoi narrativën si pjesë të strategjisë për mobilizim nacionalist dhe devijim të vëmendjes nga zhvillimet e brendshme në Serbi.

Burim: Telegrafi
— Redaksia ZHURMA