Pse amendamenti i PE i referohej Vjosë-Nartës, jo Zvërnecit?
ABC News zbuloi dokumentin origjinal: rezoluta me 483 vota nuk përmend asnjëherë Zvërnecin, Sazan-in apo Kushner-in.
TIRANË — ABC News ka siguruar rezolutën e plotë të Parlamentit Evropian, miratuar me shumicën prej 483 votave, bashkë me të gjitha amendamentet mjedisore për Shqipërinë. Dokumenti i plotë zbulon se amendamenti i shumëdiskutuar — interpretuar gjerësisht si "goditje ndaj investimit në Zvërnec dhe Sazan" — në fakt i referohet krejtësisht zonës tjetër: Vjosë-Nartës.
Vjosë-Narta është zonë e mbrojtur, jo peizazh i mbrojtur i kategorisë 5 si Zvërneci. Debati për këtë zonë ka rrënjë disa vite më parë, pas ndërhyrjeve të paligjshme, dhe qeveria Rama vendosi rreth katër vite më parë të mbrojë lumin Vjosë — lumin e fundit të egër të Evropës — nga projektet për ndërtimin e hidrocentraleve.
Amendamenti, i propozuar nga Të Gjelbrit evropianë, shprehet: "Shpreh shqetësim serioz se zhvillimet e vazhdueshme brenda zonës së mbrojtur Vjosë-Nartë tregojnë pasojat praktike të këtyre ndryshimeve legjislative dhe rreziqet që vijnë si pasojë e tyre". PE shton se ndjek nga afër protestat masive paqësore në lidhje me çështjen mjedisore.
Vetëm amendamenti nr. 4, i paraqitur nga Left Group — grupimi i së majtës ekstreme — kishte si qëllim denoncimin e investimit të Jared Kushner, dhëndrit të presidentit Trump, në Zvërnec dhe Sazan. Ai u rrëzua me votë nga mbi 400 eurodeputetë — shumica dërrmuese e Parlamentit Evropian.
Amendamenti 47 shpreh shqetësime për zgjatjen e ligjit të investimeve strategjike. Ndërkohë, PE kërkon shfuqizimin e disa amendamenteve të papërshtatshme që u futën në ligjin shqiptar për zonat e mbrojtura në vitin 2024, dhe deri në atë korrigjim kërkon moratorium për lejet e reja të ndërtimit brenda zonave të mbrojtura.
PE nënvizon se nuk është kundër projekteve apo investimeve — por kërkon që Shqipëria të sigurohet se ato realizohen në përputhje me standardet e BE-së. Çdo projekt duhet t'i nënshtrohet vlerësimeve gjithëpërfshirëse të ndikimit në mjedis, me proces transparent të pjesëmarrjes publike, shkencëtarëve dhe shoqërisë civile.
Rezoluta e miratuar me 483 vota nuk përmend asnjëherë as Zvërnecin, as Sazan-in dhe as Kushner-in — vetëm zonat e mbrojtura sipas legjislacionit europian. PE i kujton hapur Tiranës: pajtueshmëria mjedisore nuk është opsion, por parakusht për anëtarësimin në BE.
Burim: ABC News
— Redaksia ZHURMA