Helmimi i 3600 banorëve në Gostivar përplas partitë
LSDM kërkon dorëheqjen e ministrit të Shëndetësisë, ndërsa VMRO-DPMNE ia drejton gishtin kreut të komunës, Valbon Limani.
GOSTIVAR — Partitë politike në Maqedoninë e Veriut kanë nisur përplasje të ashpra lidhur me përgjegjësitë për ndotjen e ujit në Gostivar. Ndërsa numri i qytetarëve me simptoma helmimi ka arritur në 3600 veta, subjektet po shkëmbejnë akuza të rënda, duke kërkuar dorëheqje të zyrtarëve shtetërorë.
Opozita e udhëhequr nga LSDM-ja po kërkon dorëheqje të menjëhershme nga ministri i shëndetësisë Sasho Klekovski e deri te kryeprokurori Nenad Saveski. Kryetari i kësaj partie, Venko Filipçe, akuzoi institucionet se kanë fshehur rezultatet e analizave të ujit, duke lejuar helmimin e mbi 3000 banorëve të Gostivarit.
Filipçe kërkoi përgjegjësi penale për drejtuesit e Institutit për Shëndet Publik dhe Agjencisë së Ushqimit, duke thënë se po luhet me shëndetin e qytetarëve. Kjo përplasje vjen ndërkohë që qyteti ka ndaluar ujin e çezmës dhe banorët nuk lejohen ta përdorin atë për shkak të ndotjes.
Nga ana tjetër, VMRO-DPMNE e drejton gishtin nga autoritetet lokale. Ata pyesin pse LSDM, BDI dhe Taravari nuk kërkojnë përgjegjësi nga kreu i komunës, Valbon Limani, duke deklaruar se shërbimet komunale nuk kanë lëvizur as gishtin për të parandaluar këtë skandal të rëndë shëndetësor.
Ndërkaq, bashkëkryetari i VLEN, Izet Mexhiti, tha se nuk ka dashur ta vizitojë Gostivarin për të mos e ngarkuar politikisht situatën. Ai theksoi se u takon institucioneve të vlerësojnë gabimet, ndërsa për pastrimin e rrjetit janë kyçur edhe ekipe nga Ujësjellësi i Shkupit.
Burim: Alsat-M
— Redaksia ZHURMA