Pandeli Majko: Zgjedhja e presidentit po kthehet në lodër vetëvrasëse

Situata e krijuar nga bllokada politike dhe pamundësia për të zgjedhur presidentin e Kosovës ka shkaktuar reagimin e ish-kryeministrit të Shqipërisë, Pandeli Majko. Përmes një shkrimi në rrjetin social Facebook, ai ka paralajmëruar se vendi rrezikon seriozisht të hyjë në paradhomën e shteteve të dështuara.

Sipas Majkos, procesi i zgjedhjes së kryetarit të shtetit në Prishtinë po shndërrohet në një «lodër vetëvrasëse», ndërsa përplasjet aktuale po dëmtojnë mekanizmin përfundimtar për daljen nga kriza institucionale, i cili lidhet me zgjedhjet e parakohshme. Ai ka shtuar se votuesit kanë ngrirë rezultatet dhe mosmarrëveshjet, duke lënë Kosovën jetime në kutinë e votimit.