Pse fton Osmani mërgatën të votojë të lirë?
Kandidatja e LDK-së për presidente fton diasporën të votojë të lirë, duke kujtuar kontributin historik të mërgatës.
PRISHTINË — Kandidatja për presidente nga Lidhja Demokratike e Kosovës, Vjosa Osmani, ka deklaruar se Kosova nuk do të mund t'ia shpaguajë kurrë diasporës gjithë kontributin që ka dhënë ndër vite për vendin.
Në emisionin "Rubikon", Osmani tha se mërgata ka pasur rol kyç në periudha të rëndësishme të historisë së Kosovës, duke përmendur lobimin ndërkombëtar, luftën për çlirim dhe mbështetjen pas luftës. "Kosova kurrë nuk do të mund t'i hapte dyert në Shtëpinë e Bardhë pa kontributin e mërgatës sonë në vitet e '90-ta", tha ajo. "Po ashtu, Kosova nuk do të arrinte kurrë çlirimin pa ata djem e vajza që lanë jetën komode në shtetet perëndimore dhe erdhën për të dhënë jetën për Kosovën".
Osmani shtoi se diaspora ka ndihmuar edhe në rindërtimin e vendit pas luftës dhe vazhdon të japë kontribut të jashtëzakonshëm edhe sot. "Le të votojnë kë të duan. Me rëndësi është që sot të gjithë votojmë në liri", deklaroi ajo.
Burim: Gazeta Express
— Redaksia ZHURMA