Operacioni «Caveau 38» zbulon pastrimin e 14 milionë eurove dhe trafikun e kokainës

Autoritetet italiane goditën një organizatë kriminale të përbërë kryesisht nga shtetas shqiptarë, e dyshuar për trafikimin e rreth 240 kilogramëve kokainë dhe pastrimin e mbi 14 milionë eurove. Operacioni i koduar «Caveau 38» u zhvillua nga Guardia di Finanza në Lecco, nën drejtimin e Drejtorisë së Antimafias në Milano dhe me bashkëpunimin e SPAK-ut nga Tirana.

Më parë ishte raportuar për hetimin dhe dërgimin në paraburgim të një 22-vjeçari shqiptar lidhur me sekuestrimin e lëndëve narkotike në Itali. Hetimet e mëtejshme çuan në zbulimin e një rrjeti shumë më të gjerë ndërkombëtar të trafikimit të drogës dhe pastrimit të fitimeve kriminale, duke u zgjeruar në disa vende të Evropës.

Sipas mediumit italian Il Giorno, verifikimet e hetuesve kanë zbuluar se organizata funksiononte si një rrjet ndërkombëtar që trafikonte lëndë narkotike mes Shqipërisë, Italisë, Holandës dhe Gjermanisë. Hetuesit raportojnë se gjatë periudhës 2019–2022 janë transportuar rreth 240 kilogramë kokainë nga Shqipëria drejt territorit italian. Fitimet e realizuara nga ky aktivitet ilegal, të cilat kapin vlerën e miliona eurove, mblidheshin dhe dërgoheshin përsëri drejt Shqipërisë. Transporti i lëndëve narkotike dhe i parave bëhej përmes automjeteve dhe kamionëve të përshtatur me hapësira të fshehta. Anëtarët e grupit përdornin aplikacione të enkriptuara për të organizuar transaksionet dhe lëvizjen e mjeteve financiare.

Guardia di Finanza njoftoi se zbulimi i këtij rrjeti nisi pas kontrolleve të kryera për shitjen e drogës në hapësirat publike të Cernusco Lombardone dhe Merate. Gjatë zhvillimit të operacionit «Caveau 38», autoritetet kanë identifikuar 52 persona nën hetim dhe kanë arrestuar në flagrancë gjashtë persona. Në kuadër të aksionit janë sekuestruar mbi 1.5 milion euro para të gatshme dhe rreth 32 kilogramë lëndë narkotike, ku përfshihen kokainë, heroinë dhe kanabis.

Hetuesit bëjnë me dije se pastrimi i parave kryhej përmes skemave të ndërlikuara financiare, përfshirë blerjen e metaleve të çmuara. Organizata kishte blerë afro tetë kilogramë lingota ari përmes një kompanie të përpunimit të metaleve të çmuara me seli në Milano dhe Alessandria. Gjithashtu, një kompani tjetër në zonën e Lecco-s përdorej si kasafortë financiare përmes investimeve në pasuri të paluajtshme. Të dyja këto sipërmarrje janë vendosur nën sekuestro preventive.

Autoritetet kanë caktuar një administrator gjyqësor për kompanitë e sekuestruara me qëllim që të garantohet vazhdimësia e aktivitetit të tyre të ligjshëm. Bashkëpunimi dypalësh mes hetuesve të SPAK-ut në Tiranë dhe me strukturat antimafia në Itali do të vijojë për rindërtimin e plotë të lëvizjes së parave dhe lëndëve narkotike mes katër shteteve.