Operacion anti-drogë në Spanjë, mbi 10 tonë kokainë në fokus të hetimeve

Një operacion i madh anti-drogë në qytetin Águilas të Spanjës ka vënë në qendër të hetimeve një organizatë kriminale shqiptare, pasi janë zbuluar mbi 10 tonë kokainë të magazinuara në dy ambiente industriale. Droga dyshohet se përdorej si bazë për grumbullimin dhe shpërndarjen në Spanjë dhe vende të tjera të Evropës, ndërsa vlera e ngarkesës në tregun e paligjshëm përllogaritet mbi 100 milionë euro.

Zbulimi në zonën industriale El Labradorcico ndodhi pasi një paletë e ngarkuar me kokainë ra gjatë procesit të shkarkimit, duke dëmtuar një pjesë të ngarkesës dhe shpërndarë pako në dysheme. Punëtorët u larguan me shpejtësi duke braktisur mjetin e punës, ndërsa një patrullë e Policisë Bashkiake mbërriti e njoftuar për një aksident të mundshëm në punë por nuk gjeti njeri. Pas kontrolleve të mëtejshme, autoritetet zbuluan edhe kapanonin e dytë, duke numëruar fillimisht mbi 5 tonë kokainë në kapanonin e parë dhe duke rritur ndjeshëm sasinë e sekuestruar.

Hetuesit e Njësisë për Luftën kundër Krimit të Organizuar dhe Trafikut të Drogës po analizojnë adresat e shënuara në kutitë e kokainës, element ky që pritet t'u shërbejë për të rindërtuar rrjetin e shpërndarjes, për të përcaktuar destinacionet e ngarkesave dhe për të identifikuar personat që qëndrojnë pas organizimit të trafikut.