Pse rriten çmimet e One Albania?

TIRANË — Prej disa muajsh, qindra abonentë të One Albania po përballen me një rritje të çmimit të shërbimeve celulare, edhe pse kontratat e tyre janë firmosur me një tarifë fikse për një ose dy vite. Kompania njoftoi se do të indeksonte çmimet e shërbimeve celulare me indeksin mesatar vjetor të çmimeve të konsumit.

Abonentët kanë denoncuar rastet e tyre pranë InfoNews, duke shprehu se kanë nënshkruar kontrata 12 ose 24-mujore me një çmim të përcaktuar qartë, ndërsa kompania ka vendosur ta ndryshojë atë në mënyrë të njëanshme gjatë kohës që kontrata është ende në fuqi.

Sipas ankesave, kur abonentët kanë kërkuar sqarime, One Albania është përgjigjur se e drejta për të indeksuar çmimet parashikohet në kushtet e kontratës. Megjithatë, qytetarët ngrenë një pyetje të fortë: nëse kompania ka të drejtë të ndryshojë çmimin gjatë kontratës, përse klienti nuk mund të largohet pa penalitet kur nuk është më dakord me kushtet ekonomike?

Qytetarët kërkojnë ndërhyrjen e institucioneve përgjegjëse për të verifikuar nëse praktika e ndjekur është në përputhje me legjislacionin për mbrojtjen e konsumatorit dhe me parimin e kontratave të drejta.

Burim: Report Tv, https://report.al/one-albania-rrit-cmimet-pergjigja-per-qytetaret-ne-kemi-te-drejte-ju-jo/
— Redaksia ZHURMA