Strasburgu konstatoi 12 shkelje nga Shqipëria

TIRANË — Gjykata Evropiane për të Drejtat e Njeriut konstatoi 12 shkelje të Konventës Evropiane në çështjet kundër Shqipërisë gjatë 2025-ës, sipas raportit të Avokatit të Shtetit. Nga 34 vendime të dhëna për 44 ankesa gjithsej, Gjykata u akordoi ankuesve rreth 7.9 milionë lekë dëmshpërblim, ndërsa këta kishin kërkuar 1.7 miliardë lekë.

Gjykata i shmangu buxhetit të shtetit një dëm të mundshëm prej 1.6 miliardë lekësh, duke akorduar shumë më pak se sa kërkohej. Në 16 raste kërkesat u shpallën të papranueshme, ndërsa 6 çështje u hoqën nga lista, kryesisht pas zgjidhjes me pajtim ose mungesës së interesit të kërkuesve.

Përgjatë vitit u komunikuan 31 çështje të reja: 15 me natyrë civile, 8 penale dhe 8 lidhur me shkarkimin nga detyra të kërkuesve në procesin e vettingut. GJEDNJ i dërgoi gjithashtu Komitetit të Ministrave të Këshillit të Evropës 13 çështje shqiptare për mbikëqyrjen e ekzekutimit të vendimeve.

Aktualisht 63 çështje ndaj Shqipërisë janë nën monitorim të Komitetit të Ministrave, nga të cilat 7 ndiqen me procedurë të përshpejtuar. Gjatë vitit u dërguan 27 plane e raporte veprimi, ndërsa Komiteti mbylli monitorimin për 8 çështje.

Bazuar në shkeljet e konstatuara, GJEDNJ dhe Avokatura e Shtetit kërkojnë plotësimin e vakancave në gjykata, rritjen e burimeve njerëzore dhe uljen e stokut të dosjeve. Rekomandohet edhe garantimi i aksesit efektiv në Gjykatën Kushtetuese, pasi kjo gjykatë ka gabuar në llogaritjen e afatit për paraqitjen e një ankese pas vendimit të Gjykatës së Lartë.

Burim: Shqiptarja
— Redaksia ZHURMA