Si përfaqësuan gjashtë nxënës kosovarë vendin në EAGLE 2026?

WASHINGTON — Gjashtë nxënës kosovarë përfaqësuan vendin në programin EAGLE 2026 (Excellence in AI and Global Leadership), një iniciativë e Departamentit të Shtetit të SHBA-së, duke marrë pjesë në një përvoje të plotë lidershipi, teknologjie dhe bashkëpunimi ndërkombëtar. Mat Baruti, Art Qorraj, Ardisa Hamiti, Leart Obertinca, Rigon Haxhijaj dhe Rrita Canolli, të shoqëruar nga mentorja Ariana Gerqari, qëndruan në Seattle dhe Washington, D.C.

Gjatë programit, nxënësit morën pjesë në trajnime intensive dhe punëtori për zhvillimin e lidershipit, komunikimit dhe aftësive të bashkëpunimit ndërkombëtar. Ata vizituan kompanitë lider të teknologjisë Google, Amazon dhe Microsoft, ku u njohën me zhvillimet më të fundit në inteligjencën artificiale, inovacion dhe teknologji moderne.

Një eksperiencë thelbësore ishte vizita pranë Byrosë për Çështje Arsimore dhe Kulturore (ECA) të Departamentit të Shtetit, ku u informuan për programet amerikane të shkëmbimit arsimor dhe bashkëpunimit ndërkombëtar. Nxënësit qëndruan edhe pranë familjeve pritëse amerikane, duke u njohur nga afër me kulturën dhe jetën e përditshme amerikane.

Programi EAGLE 2026 mblodhi të rinj nga Kosova, Shtetet e Bashkuara të Amerikës dhe Koreja e Jugut, me qëllim zhvillimin e aftësive në lidership, komunikim dhe përdorimin e teknologjive bashkëkohore. Pjesëmarrja e nxënësve kosovarë u vlerësua si arritje e rëndësishme në përfaqësimin e vendit në një program ndërkombëtar të mbështetur nga Departamenti i Shtetit.

Nxënësit shprehën se kjo eksperiencë do të mbetet një kujtim i paharrueshëm dhe një investim në zhvillimin personal, akademik dhe profesional. Aktivitetet e programit u pasqyruan në kanalet zyrtare të ECA-s, duke vënë në pah rëndësinë e angazhimit të të rinjve në bashkëpunimin ndërkombëtar.

Burim: Albinfo.ch
— Redaksia ZHURMA