Ku do të realizohen murale për Kupën e Botës?

Nju Jork, 15 korrik. Atmosfera e Kupës së Botës FIFA 2026 po e përfshin Amerikën e Veriut dhe tani do të lërë një gjurmë të përhershme edhe në rrugët e Nju Jorkut. Kryetari i qytetit, Zohran Mamdani, ka njoftuar realizimin e 12 muraleve në pesë lagjet kryesore të qytetit, si homazh për turneun më të madh në historinë 96-vjeçare të Kampionatit Botëror.

Projekti nisi më 14 korrik në parkun Montbellier në lagjen Laurelton të Queens, ku artistja Peach Tao po realizon muralin e parë. Banorët e qytetit do të kenë mundësinë të kontribuojnë në krijimin e muraleve gjatë ditëve të dedikuara për pikturim komunitar.

Komisionerja për Çështjet Kulturore në Nju Jork, Diya Vij, tha se qyteti është gjallëruar nga fryma e Kupës së Botës, ndërsa muralet do të pasqyrojnë këtë moment të veçantë, ku banorë me prejardhje nga e gjithë bota po bashkohen përmes sportit.

Muralet do të realizohen në lagje të ndryshme të Bronksit, Bruklinit, Manhatanit, Queens-it dhe Staten Island-it, secili i konceptuar nga një artist lokal. Finalja e Kupës së Botës FIFA 2026 do të zhvillohet më 19 korrik në stadiumin MetLife në East Rutherford, New Jersey.

Burim: KultPlus, https://kultplus.com/nju-jorku-do-te-realizoje-12-murale-per-te-perjetesuar-kupen-e-botes-fifa-2026/
— Redaksia ZHURMA