Nikolloski: Aeroporti i Ohrit pret deri në 400 mijë udhëtarë
Zëvendëskryeministri Nikolloski njofton rritje të ndjeshme të udhëtarëve në aeroportet e vendit krahasuar me vitin e kaluar.
Redaksia ZHURMA · · 1 min lexim
Aeroporti i Ohrit shënon rritje të ndjeshme të numrit të udhëtarëve, duke arritur shifra që tejkalojnë parashikimet e deritanishme. Zëvendëskryeministri dhe ministri i Transportit, Aleksandar Nikolloski, bëri të ditur përmes një njoftimi se këtë vit ky aeroport pritet të presë ndërmjet 370.000 dhe 400.000 udhëtarë. Këto shifra tejkalojnë ndjeshëm parashikimin e mëparshëm prej 130.000 udhëtarësh që ishte paraparë të arrihej deri në vitin 2030.
Sipas të dhënave të publikuara nga ministri, dy aeroportet e vendit, ai i Shkupit dhe i Ohrit, po i afrohen shifrës prej 4.000.000 udhëtarësh gjatë këtij viti. Kjo përbën një rritje të konsiderueshme në krahasim me vitin 2024, kur numri i udhëtarëve ishte 2.400.000. Nikolloski theksoi se ky zhvillim ndihmon gjithashtu në zhvillimin e ekonomisë lokale. «Politikat e qarta të drejtuara drejt mbështetjes nga kjo Qeveri dhe lidhjet e reja që kemi hapur kanë kontribuar në rritje të konsiderueshme të numrit të turistëve, ndërsa kështu po përmirësojmë edhe ekonominë lokale», deklaron Nikolloski.