Neonatologu Luan Morina: e qara e parë e foshnjës tregon shëndet të mirë

PRISHTINË — E qara e parë e foshnjës pas lindjes përbën një nga momentet më domethënëse dhe më emocionale jo vetëm për familjen, por edhe për vetë stafin mjekësor në sallën e lindjes. Sipas neonatologut Luan Morina, ky çast i veçantë ka rëndësi të madhe sepse tregon se foshnja ka nisur të përshtatet me jetën jashtë barkut të nënës.

Duke folur në podcastin “Shëndeti në rend të parë”, i përkrahur nga United Hospital dhe Qendra Laserike e Syrit “Kubati”, ku u diskutua për ditët dhe muajt e parë të jetës së foshnjës, sfidat e prindërve të rinj dhe këshillat më të rëndësishme për kujdesin ndaj të porsalindurve, specialisti theksoi se ky reagim i parë vokal shërben si një tregues i qartë se i porsalinduri gëzon një gjendje të mirë shëndetësore.

Morina sqaroi se ky është momenti i vetëm kur mjekët dhe prindërit gëzohen kur dëgjojnë fëmijën duke qarë gjatë orëve të para. "Momenti i parë kur ne gëzohemi që qan fëmija është kur lind", tha ai, duke e cilësuar këtë si një shenjë shumë të rëndësishme klinike, pasi tregon se foshnja është në gjendje të mirë dhe se procesi i adaptimit ka nisur si duhet.

"E qara na tregon shumë gjëra, na tregon për një kondicion të mirë, na tregon për një adaptim të mirë edhe për një fillim të mirë të foshnjës", shpjegoi Morina. Në të njëjtën kohë, kjo dëshmon se procesi i përshtatjes me mjedisin e ri jashtë mitrës së nënës ka nisur në mënyrën më të mirë të mundshme për foshnjën.

Morina theksoi se pikërisht në momentin kur foshnja qan për herë të parë, ajo nis edhe frymëmarrjen e pavarur. "Në momentin e parë që foshnja qan, ai është momenti i parë kur foshnja edhe merr frymë vetë", u shpreh ai, duke shtuar se me të qarën e parë fillojnë të aktivizohen mushkëritë e foshnjës, të cilat marrin rolin e tyre pas lindjes. "Fillojnë mushkëritë e foshnjës të punojnë dhe të marrin detyrën të cilën e kanë", tha neonatologu, duke e cilësuar këtë moment si "tejet të rëndësishëm".

Përtej këtij momenti të parë, neonatologu adresoi edhe pasiguritë e prindërve të rinj, duke vënë theksin te rëndësishmëria e këshillimit profesional dhe e ushqyerjes me gji. Në podcast, Morina foli për shqetësimet më të zakonshme që prindërit e rinj kanë në ditët e para pas lindjes. Sipas tij, për shumë prindër kjo periudhë është e mbushur me pasiguri, pasi gjithçka është e re dhe shpesh nuk dinë çfarë duhet të vëzhgojnë më shumë. "Nëse flasim për prindër të rinj, normalisht për ta është gjithçka e panjohur", tha ai.

Ai tregoi se pyetjet më të shpeshta lidhen me ushqyerjen e foshnjës: a po pi mirë, a po merr sasinë e mjaftueshme të qumështit dhe kur duhet të shqetësohen prindërit. "Kryesisht i kemi telashet: a po pin mirë, si duhet të vlerësojmë ne që po ushqehet mirë, a jemi duke dhënë sasinë e mjaftueshme?", tha Morina.

Neonatologu theksoi se në këtë periudhë është shumë e rëndësishme që prindërit të marrin informacion të saktë nga profesionistët shëndetësorë, sidomos për ushqyerjen me gji. "Ne gjithmonë e kemi këshillën dhe insistimin më të madh si profesionistë, insistojmë që foshnjat të ushqehen me gji", u shpreh ai. Sipas Morinës, gjidhënia është një nga faktorët më të rëndësishëm në ditët e para të jetës së foshnjës, ndërsa nënat duhet të këshillohen dhe të mbështeten për mënyrën e duhur të ushqyerjes.

Burim: Telegrafi
— Redaksia ZHURMA