Kush nuk pranon ndarjen e kufijve?

Një protestë paqësore me pjesëmarrjen e disa dhjetëra qytetarëve u mbajt të premten, më 3 korrik 2026, përpara godinës së Komunës së Tuzit, për çështjen e ndarjes territoriale-administrative ndërmjet Tuzit dhe Podgoricës. Organizatorët thanë se arsyeja e tubimit është një padrejtësi që po i bëhet territorit të Malësisë, duke shtuar se nuk janë dakord me propozimet e dy komisioneve të arbitrazhit, atij të Tuzit dhe atij të Podgoricës, për ndarjen e kufijve.

Njëri ndër organizatorët e kësaj proteste, Prelë Ujkaj, tha se kjo protestë nuk është një protestë politike, por qytetare. Ai theksoi: “Unë nuk e kam bërë protestën kundër askujt, as për të akuzuar pushtetin lokal dhe as për të bërë përçarje, por e kemi bërë me një grup organizatorësh që i kanë ndenjur besnik daljes Zot të Malësisë”. Ujkaj nënvijoi se me territorin e Malësisë nuk ka hile as lojë, dhe u kundërshtua plotësisht propozycioneve të dy komisioneve.

Duke qenë pjesë e vendbanimit Rakiq, sipas hartës së prezantuar, mbi 1.8 milion metra katrore tokë që i përkasin familjes së tij do të kalonin në territorin e Podgoricës. “Ne kurrë nuk do ta pranojmë atë ndarje. Ne në bazë të Ligjit përkatës dhe atij që është në fuqi sot, i takojmë Tuzit. Të gjitha të drejtat tona i ushtrojmë në Komunë të Tuzit. Rakiqi është Malësi. Tuzi nuk shitet, nuk zvogëlohet”, tha Ujkaj. Ai theksoi se Rakiqi ka dhënë edhe për kombin shqiptar, dhe se objekti më i vjetër me lidhje direkte me Malësinë ndodhet në tokën e tyre: objekti i të mëdhenjve Martin dhe Mirash Ivanaj, i cili historikisht vërteton autoktoninë e tyre.

Organizatorët kritikuan fortë komisionin e arbitrazhit, duke thënë se ky ishte në Podgoricë prej tetë vitesh dhe asnjë deklaratë të vetme nuk ka dhënë për ndarjen e kufirit. Kërkuan dorëheqjen e përfaqësuesve të Komunës së Tuzit në komision. Sipas Ujkajt, harta e prezantuar mungon një e katërta të territorit të Malësisë. “Ne, me këtë tentativë të largimit tonë, i humbim të drejtat tona nga Komuna e Tuzit, të drejtat tona shqiptare si popull pakicë në komunën ku populli ynë përbën shumicën. Ne kemi luftuar për komunë të plotë”, theksoi ai.

Ujkaj falënderoi pjesëmarrësit që protestuan për të mbështetur Rakiqin, pjesën juglindore të malit të Kakarriqit, sepse aty jeton popullsi 100 për qind shqiptare, që mbështesin pjesën e Luharit, Nëgotinit, Lloparit dhe Rabrajve, si edhe majën e Kazhenikut legjendar në Triesh, Koshticën dhe pjesën e Rikavecit që janë bjeshkët e malësorëve. Ai u zotua se, nëse do të jetë e nevojshme, këtë proces do ta adresojnë deri në Gjykatën e Strasburgut.

Protestuesit valëvitnin flamuj kuqezi dhe mbanin pankarta me mbishkrime: “Transparencë e munguar – kufij të cunguar”, “Malësia nuk zvogëlohet kurrë”.

*Burim: Koha Javore, https://kohajavore.me/opinione/fokus/harta-e-ndarjes-se-kufijve-ngjall-kundershtime/*

*— Redaksia ZHURMA*