Puff Daddy transferohet në burg pas akuzave për jetë luksi

Reperi i njohur në Shtetet e Bashkuara të Amerikës, Sean Combs, i njohur si “Diddy” dhe “Puff Daddy”, është transferuar nga një burg në Nju Xhersi në një institucion tjetër në Pensilvani. Transferimi erdhi pas akuzave se ai po bënte një jetë luksoze në qeli dhe pas pretendimeve për një përleshje ku thuhet se ishte plagosur.

Një burim deklaroi për Associated Press se Combs u transferua pas këtyre zhvillimeve. Zëdhënësja e tij, Juda Engelmayer, u shpreh se reperi është i përqendruar te vazhdimi i jetës së tij dhe se shpreson që procesi në objektin e ri të jetë efikas.

Sipas raportimeve, më herët ishte pretenduar se reperi kishte përfituar trajtim të veçantë në qeli, duke përfshirë të burgosur të tjerë që i kryenin shërbime dhe përdorimin e një celulari të ndaluar. Po ashtu, u raportua për një përleshje me një të burgosur tjetër që kërkoi trajtim.