Policia ndalon tre të dyshuar me armë e municion në veturë me targa serbe
Policia konfiskoi 8.919 fishekë, gjashtë armë e 3.470 euro nga automjeti i ndaluar.
PRISHTINË — Policia e Kosovës ndaloi tre nga gjashtë të dyshuarit e identifikuar në hetimin për një veturë me targa të Serbisë, pasi Dogana e Kosovës njoftoi për ndalimin e automjetit të dyshuar. Prokuroria Themelore në Prishtinë urdhëroi mbajtjen e tyre në paraburgim për 48 orë, konfirmoi Policia e Kosovës (PK).
Në kontrollin e kryer nga Departamenti për Kufi, në koordinim me prokurorinë, u gjetën e u konfiskuan gjashtë armë zjarri — katër të shkurta e dy të gjata — 8.919 fishekë të kalibrave të ndryshëm, një shurdhues për armë dhe 3.470 euro në para të gatshme.
Gjashtë të dyshuarit u intervistuan në prani të avokatëve mbrojtës, ndërsa automjeti me të cilin, sipas PK-së, është kryer vepra penale u konfiskua si provë materiale. Hetimet e mëtejshme po vazhdojnë.
Burim: Lajmi.net
— Redaksia ZHURMA