Policia ndalon tre persona dhe konfiskon 8.919 fishekë e gjashtë armë në Prishtinë
Aksioni nisi pasi Dogana ndaloi një veturë me targa serbe që fshihte municion në një bunker të improvizuar.
Redaksia ZHURMA · · 1 min lexim
PRISHTINË — Gjashtë persona janë shoqëruar në polici, ndërsa tre prej tyre janë ndaluar për 48 orë, pas një aksioni të Policisë së Kosovës në koordinim me Prokurorinë e Prishtinës dhe Doganën e Kosovës. Në aksion janë konfiskuar gjashtë armë zjarri, 8.919 fishekë të kalibrave të ndryshëm dhe një shurdhues për armë.
Sipas njoftimit të Policisë, aksioni erdhi pas një hetimi që zgjati një periudhë më të gjatë, të nisur nga një informatë e Doganës së Kosovës. Dogana kishte ndaluar një automjet me targa të Serbisë, në të cilin ishte fshehur municion i kalibrit 9 mm brenda një bunkeri të improvizuar.
Pas kësaj, njësitet e Departamentit për Kufi kontrolluan katër lokacione në rajonin e Prishtinës. Si prova janë gjetur e konfiskuar gjashtë armë (katër të shkurta, dy të gjata), 8.919 fishekë, një shurdhues për armë, 3.470 euro, si dhe automjeti me të cilin është kryer vepra penale.
Të dyshuarit u intervistuan në prani të avokatëve mbrojtës, dhe me vendim të prokurorit tre prej tyre u dërguan në mbajtje 48-orëshe. Policia thotë se do të vazhdojë bashkëpunimin me Prokurorinë dhe Doganën për parandalimin e trafikimit të armëve të zjarrit.
Burim: Kallxo
— Redaksia ZHURMA
