Blakaj: Marrëveshja e Brukselit ende s'ka dhënë rezultate për të zhdukurit

PRISHTINË — Drejtori i Fondit për të Drejtën Humanitare, Bekim Blakaj, tha se pavarësisht marrëveshjes së arritur në Bruksel më 2023 mes Kosovës dhe Serbisë për personat e zhdukur gjatë luftës, "s'kemi parë rezultate pozitive në terren" dhe as "një kualitet të ri" në proces. Deklaratën e bëri në emisionin "Interaktiv" të KTV-së.

Blakaj tha se procesi i identifikimit të varrezave masive kishte stagnuar për vite me radhë. Që nga zbulimi i varrezës masive në Kizhevak më 2017, nuk kishte pasur identifikime të reja të varrezave masive deri të martën, kur në fshatin Kalludër e Vogël të Zubin Potokut nisën gërmimet në një lokacion të ri të dyshuar.

Në lokacionin e ri dyshohet se ndodhen 23 trupa, të cilët besohet t'i përkasin intelektualëve nga Mitrovica, të zhdukur me forcë nga forcat serbe gjatë luftës. Deri më tani, gjetjet e varrezave kishin qenë kryesisht individuale, ndërsa procesi i identifikimit kishte mbetur krejtësisht i ndalur për vite.

Kosova dhe Serbia arritën Deklaratën e përbashkët për personat e zhdukur në vitin 2023, në kuadër të dialogut për normalizimin e marrëdhënieve, të ndërmjetësuar nga Bashkimi Evropian. Mes zotimeve ishin qasja e plotë në informacione të besueshme, përfshirë ato me status të klasifikuar, si dhe puna e përbashkët përmes një komisioni të kryesuar nga BE-ja. Sipas Blakajt, asnjë nga këto pika nuk është zbatuar deri më tani.

Në fillim të këtij viti, Kosova dhe Serbia mbajtën takimin e parë të Komisionit të përbashkët për personat e zhdukur, por ai s'prodhoi ndonjë rezultat konkret. Megjithatë, Blakaj vlerësoi se procesi ka shënuar përparim krahasuar me vende të tjera të prekura nga lufta: nga rreth 4.500 emra në listën e parë të Kryqit të Kuq Ndërkombëtar në maj 2000, sot flitet për më pak se 1.600 persona ende të pagjetur.

Burim: Koha.net
— Redaksia ZHURMA