Pse po braktisin fermerët tokën?

TIRANË — Çmimi i naftës dhe i plehrave kimike ka rritur ndjeshëm kostot e prodhimit bujqësor në Shqipëri, duke detyruar fermerët të rrisin çmimet e shërbimeve ose të braktisin tokën. Një zetorist në fshatin Barbas të Tiranës, që kërkoi të mos identifikohej, thotë se kostoja e punimit dhe frezimit të një hektari tokë është rritur nga 45.000 lekë të reja vitin e kaluar në 60.000–65.000 lekë aktualisht.

"Rritja e çmimit të naftës na detyroi automatikisht të rrisim çmimet për çdo shërbim që ofrojmë në bujqësi për fermerët", shprehet ai. Sipas tij, nga viti në vit po ulet sipërfaqja e tokës së punuar, veçanërisht në kulturën e drithërave.

Parlamenti miratoi pak kohë më parë një akt normativ që parashikon uljen e akcizës me 20% kur çmimi i naftës kalon 220 lekë për litër dhe i benzinës mbi 200 lekë. Megjithatë, kjo nismë nuk pritet të ndikojë drejtpërdrejt në kostot e sektorit bujqësor, ku nafta aktualisht shitet rreth 205 lekë litri.

Në skemën kombëtare të mbështetjes për vitin 2026 u hoq ndihma për naftë falas për fermerët që punonin mbi një hektar. Ministri i Bujqësisë, Andis Salla, ka deklaruar se heqja e kësaj skeme nuk rrit kostot, pasi mbështetja është shpërndarë në forma të tjera, kryesisht në blegtori. Faktoje e vlerëson të pavërtetë këtë deklaratë.

Përveç naftës, plehrat kimike kanë shënuar rritje të ndjeshme: një kuintal pleh ure ka shkuar nga 5.500 në 6.500 lekë; nitratet nga 4.500 në 6.000 lekë; dhe dapi nga 8.500 në 9.600 lekë. Këto rritje pasqyrohen edhe në blegtori, ku kostoja e një dengu bar është rritur nga 350 në 450–500 lekë.

Skema e re e blegtorisë parasheq subvencione deri në 12.000 krerë për fermat me mbi 50 kokë bagëti të imta, por me përgjysmim të masës për pjesën mbi 50 krerë. Edhe për lopët, pragmi u ul nga 10 në 5 krerë për fermer.

Burim: Telegrafi, https://telegrafi.com/nafta-dhe-plehrat-kimike-fermeret-s-punojne-token/
— Redaksia ZHURMA