Beci: Muzeu i Drishtit në Postribë është gati të presë vizitorë
Kryebashkiaku i Shkodrës thotë se muzeu është një vlerë për komunitetin dhe identitetin e zonës
SHKODËR — Kryebashkiaku i Shkodrës, Benet Beci informoi dje se Muzeu i Drishtit në Postribë është gati të presë vizitorë. Muzeu i Drishtit iu nënshtrua një rikonstruksioni të plotë si edhe muzealizimit.
Në një postim në rrjetet sociale, Beci e cilësoi këtë muze si, një prej dëshmive më të vyera të historisë së kësaj zone, që i jep jetë një hapësire që ruan, promovon dhe rrëfen trashëgiminë tonë kulturore.
Muzeu gjendet në Kalanë e Drishtit, rreth 15 km nga qyteti i Shkodrës. Kjo është ndër të paktat kala në Shqipëri në të cilat ende banohet. Në një lartësi rreth 800 m mbi nivelin e detit, në ambientet e brendshme të saj ndodhen disa shtëpi banimi.
Kalaja e Drishtit është ngritur në shekullin XIII si një fortesë bizantine dhe mban statusin Monument Kulture që prej 1948-s. Gjendet në një distancë prej 6 km nga Ura e Mesit mbi lumin Kir, një tjetër monument kulture tepër i njohur dhe i frekuentuar.
Burim: Gazeta Tema, https://www.gazetatema.net/kulture/beci-muzeu-i-drishtit-ne-postribe-eshte-gati-te-prese-vizitore-video-i575779
— Redaksia ZHURMA
