Mushkolaj kritikon Sejdiun për pranimin e kandidaturës për president

Analisti Imer Mushkolaj ka kritikuar vendimin e Bekim Sejdiut të pranojë kandidaturën për President të Kosovës. Sejdiu ishte prezantuar si kandidat i përbashkët i Lëvizjes Vetëvendosje dhe Lidhjes Demokratike të Kosovës më 6 gusht, në kohë kur situata ishte e paqartë dhe me probleme kushtetuese. Mushkolaj tha se ish-gjyqtari i Gjykatës Kushtetuese ishte një prej njerëzve të fundit që ai e kish pritur të bëhet kandidat në një situatë të tillë. Ai ka theksuar se nga Sejdiu kish pritur një qëndrim të qartë si jurist për ligjshmërinë e procesit, veçanërisht pasi çështja ishte dërguar në Gjykatën Kushtetuese. Sipas Mushkolajt, Sejdiu e ka pranuar kandidaturën me vetëdije të plotë, duke vendosur procesin në situatë jokushtetuese. "Kisha pritur gjithkënd, Feride Rushitin e të tjerë, por një ish-gjyqtar i Gjykatës Kushtetuese me u bërë pjesë e lojës së kësaj situate, nuk e kisha pritur", ka deklaruar Mushkolaj në emisionin "Debat Plus".