Çfarë dëshmoi Murati për Altmanin në gjyq?

SAN FRANCISKO — Gjyqi mes Elon Musk dhe Sam Altman mbi të ardhmen e OpenAI hyri të hënën në javën e tretë, duke sjellë dëshmi të reja lidhur me udhëheqjen e kompanisë dhe besueshmërinë e Altmanit. Avokatët e Musk kanë shfrytëzuar ish-drejtues, mesazhe private, shënime ditari dhe shkëmbime të brendshme emailesh për ta paraqitur Altmanin si të pabesueshëm.

Dëshmia më e rëndë erdhi nga shqiptarja Mira Murati, ish-drejtoreshja e teknologjisë në OpenAI, e cila u largua nga kompania në vitin 2024. Murati, dikur bashkëpunëtore shumë e afërt e Altmanit, dëshmoi me video se ai kishte një model sjelljeje ku "i thoshte një gjë një personi dhe krejt të kundërtën një tjetri" — dhe e akuzoi drejtpërdrejt për "krijimin e kaosit" brenda kompanisë.

Gjykata pa gjithashtu mesazhe tekstuale nga Altmani drejtuar Muratit në vitin 2023, gjatë periudhës kur bordi i OpenAI e shkarkoi atë nga posti i CEO-s. Pesë ditë para se të rikthehej në detyrë, Altmani i shkroi Muratit: "A mund të tregosh në mënyrë të përgjithshme nëse është mirë apo keq?" Murati u përgjigj: "Në përgjithësi, shumë keq." Altmani ia ktheu: "Ok."

Ish-anëtarja e bordit Helen Toner, e cila mbështeti largimin e Altmanit, deklaroi se kishte ekzistuar "një model sjelljeje që lidhej me ndershmërinë dhe sinqeritetin e tij" — gjë që çoi në shkarkimin e tij. Natasha McCauley, ish-anëtare tjetër e bordit, pretendoi se Altmani kishte shkaktuar "kriza të përsëritura" nëpërmjet stilit të tij drejtues. Avokatët e Musk thirrën gjithashtu bashkëthemelusin dhe ish-kryeshkencëtarin Ilya Sutskever — i larguar nga OpenAI në 2024 — i cili shprehu shqetësime për mënyrën e drejtimit dhe vërtetësinë e Altmanit.

Çështja e Musk bazohet mbi akuzat se OpenAI ka shkelur marrëveshjen themeluese duke u shndërruar nga organizatë jofitimprurëse në strukturë fitimprurëse — akuza që Altmani i mohon. Pritet që Altmani të dëshmojë vetë në ditët në vijim, raporton The Guardian.

Burim: Zëri
— Redaksia ZHURMA