MSH urdhëron inspektim të jashtëzakonshëm për trajtimin e pacientes nga Strumica
ISHSSH kontrollon Spitalin e Strumicës, Spitalin Klinik të Shtipit dhe Klinikën e Neurologjisë në Shkup.
SHKUP — Ministria e Shëndetësisë njoftoi se, me urdhër të ministrit, Inspektorati Shtetëror Sanitar dhe Shëndetësor (ISHSSH) ka nisur mbikëqyrje të jashtëzakonshme inspektuese në të tria institucionet shëndetësore ku u trajtua pacientja që prej ditësh është në qendër të interesimit publik.
Kontrollohen ISHP Spitali i Përgjithshëm Strumicë, ISHP Spitali Klinik Shtip dhe ISHP Klinika Universitare e Neurologjisë – Shkup. Gjatë ditëve në vijim pritet që inspektorati t'i përfundojë mbikëqyrjet dhe të sigurojë dokumentacionin e plotë mjekësor nga të tria spitalet.
Ministria thekson se respektimi i së drejtës së pacientes për dinjitet, privatësi dhe mbrojtje të të dhënave personale e mjekësore është i pacenueshëm gjatë gjithë procedurës. Çdo pacient ka të drejtë ligjore për kujdes shëndetësor të sigurt, cilësor dhe në kohë, si dhe për informacion të plotë e të kuptueshëm mbi gjendjen e tij.
Në bazë të gjendjes faktike do të pasojnë përfundimet e mbikëqyrjes profesionale dhe, nëse është e nevojshme, edhe veprime të mëtejshme. Përgjegjësia e mundshme e punonjësve shëndetësorë të përfshirë do të përcaktohet vetëm sipas rezultateve të mbikëqyrjes, e jo përmes gjykimit publik para përfundimit të procedurave.
Ministria u bën thirrje opinionit dhe mediave për korrektësi dhe mbrojtje të dinjitetit të punonjësve shëndetësorë, ndërsa e fton opinionin të mos nxjerrë përfundime të parakohshme. Asnjë aspekt nuk do të lihet pa u shqyrtuar dhe, nëse konstatohen lëshime, do të ndërmerren masat përkatëse sipas dispozitave ligjore në fuqi.
Burim: Almakos
— Redaksia ZHURMA