Haxhijaha Xhaferi: Telefonat janë thikë me dy teha për nxënësit

Teknologjia po bëhet pjesë e arsimit, por përdorimi i kontrolluar i saj gjatë orëve mësimore mbetet sfidë për shkollat. Pranvera Haxhijaha Xhaferi, profesoreshë e lëndës së informatikës, theksoi se pajisjet telefonike janë bërë të pranishme në përditshmërinë e nxënësve, duke ndikuar në përqendrimin e tyre gjatë procesit edukativ.

Sipas saj, prania e telefonit pranë nxënësit, qoftë i përmbysur apo në gjendje vibrimi, krijon impuls për të kontrolluar njoftimet. Haxhijaha Xhaferi u shpreh se «nga përvoja ime që kam parë se deri sa telefoni është afër nxënësit qoftë ai të jetë i përmbysur ose të jetë në vibrim nxënësi ka impuls që t’i sheh notifikacionet të cilat paraqiten dhe kjo atë e shpërqëndron dhe koncentrimi i tij ndahet të sheh se cka ndodh në telefon apo të ndëgjonë rrjedhen e mësimit».

Profesoresha shtoi se me programet e reja mësimore synohet vendosja e nxënësit në qendër të procesit përmes aktiviteteve edukative. Ajo theksoi se autoriteti i profesorit nuk ka të njëjtin ndikim si më parë, ndaj çelësi për shmangien e shpërqendrimit është angazhimi i vazhdueshëm i nxënësve në orë.