Temperatura deri në 39 gradë Celsius këtë të diel
Sa do të rriten temperaturat dhe ku priten reshjet e izoluara në territor?
TIRANË — Shërbimi Meteorologjik Ushtarak njoftoi se gjatë së dielës, 28 qershor, Shqipëria do të ndikohet nga masa ajrore të nxehta. Temperaturat do të luhaten midis vlerave 20 dhe 39 gradë Celsius, duke shënuar një rritje të ndjeshme të nxehsisë në të gjithë vendin.
Moti parashikohet të jetë i kthjellët deri në mesditë, ndërsa pas kësaj ore priten kthjellime e vranësira të pakta deri në mesatare. Këto vranësira do të përqendrohen kryesisht në relievet e larta kodrinore dhe malore, përpara se moti të kthehet sërish i kthjellët pasdite.
Në majat e maleve në juglindje priten reshje të izoluara shiu në formë pikash gjatë orëve më të nxehta të mesditës. Era do të fryjë me shpejtësi mesatare 7 m/s, por në vijën bregdetare dhe lugina shpejtësia mund të shkojë deri në 14 m/s, ndërsa valëzimi në detet Adriatik dhe Jon do të jetë 1-3 ballë.
Burim: ATSH
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.