Molliqaj: Zgjedhja e Konjufcës u bë për mashtrim dhe hajgare

Kryetari i PSD-së, Dardan Molliqaj, ka komentuar zgjedhjen e Glauk Konjufcës në krye të grupit punues të themeluar nga Qeveria, duke e cilësuar atë si një formë për të mashtruar qytetarët dhe për t'i bërë hajgare PDK-së.

Gjatë një paraqitjeje televizive, Molliqaj deklaroi se ky grup punues për bashkërendimin e mbështetjes juridike, institucionale dhe diplomatike për ish-krerët e Ushtrisë Çlirimtare të Kosovës në procedurat e Apelit nuk do të sjellë rezultate konkrete. Ai u shpreh se veprimi u bë për të bërë hajgare me PDK-në dhe për të mashtruar qytetarët.

Sipas tij, shqetësimi qëndron te fakti se PDK-ja dhe Aleanca i kanë krijuar kryeministrit Albin Kurti mundësinë që të paraqitet si dikush që po ndërmerr veprime për UÇK-në. Qeveria e Kosovës ka miratuar themelimin e këtij grupi punues, i cili do të kryesohet nga zëvendëskryeministri i parë dhe ministri i Punëve të Jashtme dhe Diasporës, Glauk Konjufca, duke përfshirë përfaqësues institucionalë dhe parlamentarë.