Ndalohet dalja në det e mjeteve të vogla në Vlorë e Sarandë — dallgët deri në 3.5 metra
Kapiteneritë e Porteve Vlorë dhe Sarandë vendosin kufizime për shkak të përkeqësimit të motit
VLORË — Mjetet e vogla lundruese dhe ato të peshkimit nuk do të lejohen të dalin në det të hapur sot, pasi Kapiteneritë e Porteve Vlorë dhe Sarandë kanë vendosur kufizime për shkak të përkeqësimit të motit në det.
Parashikimet flasin për erë në drejtimin veri–veriperëndim me forcë deri në 6–7 ballë, ose 15–25 metra në sekondë, ndërsa dallgët pritet të arrijnë lartësinë nga 1.5 deri në 3.5 metra. Për mjetet e vogla që lundrojnë brenda gjirit të Vlorës nuk ka ndalim, por Kapiteneria u kërkon drejtuesve të tregojnë kujdes të shtuar për shkak të kushteve të vështira në det.
Ndërkohë, anijet e transportit ndërkombëtar detar do të vijojnë lundrimin normalisht sipas itinerareve të planifikuara. Burim: Shqiptarja — Redaksia ZHURMA