Mitrovica lidh kontratë 3-vjeçare për qentë endacakë — pranohet vetëm një ofertë
Shërbimi do të kryhet nga dy operatorë ekonomikë me financim nga buxheti i shtetit.
MITROVICË — Komuna e Mitrovicës ka nënshkruar një kontratë kornizë me kohëzgjatje prej 36 muajsh për trajtimin e qenve endacakë që bredhin lirshëm në territorin e saj. Njoftimi zyrtar sqaron se ky aktivitet i prokurimit është zhvilluar përmes një procedure të hapur për të siguruar shërbimet e nevojshme.
Marrëveshja u nënshkrua më 27 korrik 2026 me grupin e operatorëve ekonomikë “Ambullanca Veterinare Veterinaria” dhe “Blendor Kadriu B.I.”. Sipas dokumentit zyrtar të publikuar, në këtë aktivitet prokurimi është pranuar vetëm një ofertë, e cila më pas është shpallur si e përgjegjshme nga autoritetet kontraktuese.
Lënda e kësaj kontrate përfshin trajtimin e qenve endacakë në territorin e Mitrovicës Jugore. Projekti për menaxhimin e këtyre kafshëve do të financohet tërësisht nga buxheti i konsoliduar i Kosovës.
Burim: IndeksOnline
— Redaksia ZHURMA