Murati: Koeficienti i pagave në sektorin publik bëhet 120
Ministri i Financave njofton se projektbuxheti për vitin 2027 sjell rritje të koeficientit dhe pagën e tretëmbëdhjetë për sektorin publik.
Redaksia ZHURMA · · 1 min lexim
Projektbuxheti për vitin 2027 parasheh rritje të koeficientit të pagave për punonjësit që paguhen nga buxheti i shtetit. Gjatë një konference për media, ministri i Financave, Hekuran Murati, ka bërë të ditur se këto masa përfshijnë edhe pagën e 13-të për punonjësit e sektorit publik.
Sipas Muratit, ndryshimi do të hyjë në fuqi në muajin e shtatë të vitit 2027. «Nga data 1 korrik 2027, punonjësve që marrin paga nga sektori publik, koeficienti i pagave nga 110 u bëhet 120», deklaroi ministri. Këto masa janë pjesë e projektbuxhetit që Qeveria e Kosovës e ka prezantuar me një vlerë të përgjithshme prej 4.27 miliardë eurosh.
