Misetiq: Prova të dobëta për përfshirjen e Thaçit në vrasjen e Allaqit

Avokati i ish-presidentit Hashim Thaçi, Luka Misetiq, ka reaguar pas shpalljes së aktgjykimit, duke thënë se pretendimi i Trupit Gjykues për përfshirjen e Thaçit në vrasjen e Behajdin Allaqit bazohet në prova “tmerrësisht të dobëta”. Ai e quajti këtë një “tjetër mohim” të të drejtave themelore të Thaçit, duke përmendur se gjyqtarët kanë urdhëruar që këto prova të mos i nënshtrohen shqyrtimit publik.

Misetiq theksoi se mungesa e transparencës së gjykatës dhe e drejta për një gjykim publik janë vënë në pikëpyetje edhe nga Komiteti i të Drejtave të Njeriut i Dhomës së Avokatëve të Anglisë dhe Uellsit. Ai më herët ka deklaruar se mbrojtja do ta apelojë aktgjykimin, duke përmendur gabime të rëndësishme në ligj dhe në vlerësimin e fakteve.

Gjatë leximit të vendimit, gjyqtari amerikan Charles L. Smith solli rastin e vrasjes së Behajdin Allaqit si mbështetje për gjetjen fajtor, duke arritur në përfundimin se Thaçi kishte marrë pjesë personalisht në arrestimin, ndalimin, transferimin dhe vrasjen e tij.

Ish-diplomati britanik Mark L. Dickinson, duke iu përgjigjur Misetiqit në platformën X, tha se vendimet e gjykatës bazoheshin pothuajse tërësisht në çështje të përgjegjësisë së komandës, duke shtuar se dëshmitarët perëndimorë bënë të qartë se Thaçi nuk ushtronte komandë efektive mbi komandantët rajonalë.