Ministria ndan 15 milionë euro për energjinë, familjet ankohen për aplikimin

Ministria e Punës dhe Familjes ka paraparë 15 milionë euro për vitin e ardhshëm për të subvencionuar faturat e energjisë elektrike për familjet në nevojë në Kosovë, ndërkohë që disa qytetarë shprehin ankesa se nuk kanë marrë përgjigje pas aplikimit ose se nuk kanë informacion të mjaftueshëm për mënyrën e përfitimit.

Programi për mbështetjen e konsumatorëve të cenueshëm është iniciuar nga Ministria e Punës dhe Familjes me synim lehtësimin e barrës financiare të familjeve në vend. Sipas kritereve zyrtare të programit, të ardhurat mesatare mujore për secilin anëtar të ekonomisë familjare gjatë 12 muajve të fundit nuk duhet të kalojnë shifrën prej 150 eurosh, ndërsa ndihma financiare mujore është caktuar të jetë nga 5 deri në 50 euro, në bazë të nevojave të secilës familje.

Gjatë zbatimit të skemës në të kaluarën, Ministri për Punë, Familje dhe Vlera të Ushtrisë Çlirimtare të Kosovës, Andin Hoti, ka deklaruar se vitin e kaluar kanë qenë rreth 100 mijë qytetarë përfitues të këtij programi. Megjithatë, përkundër njoftimeve zyrtare, disa qytetarë pohojnë se përballen me mungesë informacioni se ku duhet të aplikojnë apo si realizohet procedura, ndërsa të tjerë tregojnë se nuk kanë marrë asnjë njoftim për arsyet e mosaprovimit të kërkesave të tyre.

Lidhur me procedurat e përzgjedhjes, profesori i Ekonomisë, Fidan Qerimi, ka vlerësuar se përzgjedhja e familjeve duhet të bëhet me kujdes dhe se aplikuesit nuk duhet të përjashtohen për shkaqe të procedurave administrative, duke vënë po ashtu në dyshim qëndrueshmërinë e kësaj mase si zgjidhje afatgjate.

Përzgjedhja përfundimtare e përfituesve pritet të bëhet pasi të aprovohen subvencionimet sipas kritereve të përcaktuara në thirrjen për aplikim. Ministri Andin Hoti ka bërë të ditur se numri i saktë i familjeve përfituese do të dihet vetëm pas përmbylljes dhe aprovimit të procesit të subvencionimeve.

Fevzi Hashani, pensionist nga Obiliqi që punon si taksist, ka treguar se ka aplikuar për dy vjet rresht pa marrë asnjë përgjigje, duke thënë: «Dy vjet rresht kam apliku dhe asnjëherë nuk ma kanë njoft. 239 euro i marr pension, nuk e di arsyen, se s’më kanë kthyer asnjëherë përgjigje». Ai ka shtuar se duhet të bëhen lehtësira përmes çmimit të rrymës: «Ata duhet me bo lehtësira përmes çmimit të rrymës, e jo vetëm për një pjesë, se në Kosovë është gjendje e madhe e fukarallakut. Ajo është një mallter fytyrës, është një fasadë».

Nga ana tjetër, qytetari Alush Llumnica ka deklaruar se nuk ka informata të mjaftueshme për procesin: «Dëgju e kemi, por informata nuk kemi, veç çka kemi ni kështu. Është e duhur me i ndihmu popullit, se kanë qitë fatura me çmime ma të larta, por edhe çmimet nuk janë kërkund, se na i kemi shtyllat të lidhuna për drunjve. Energjia elektrike edhe tjetër kah po hupë». Po ashtu, qytetari Rabit Krasniqi ka thënë: «Jo, se paskemi pa. Ishalla në vesh të Zotit. Ma herët s’kemi apliku dhe nuk di që ka pasë ajo lloj platforme. Nuk e di, mundet edhe me qenë rren».

Gjithashtu, Ministri Andin Hoti ka theksuar lidhur me mjetet e ndara: «Për vitin e ardhshëm janë 15 milionë euro për subvencionimin e të gjitha familjeve që janë në nevojë. Për afërsisht, ne nuk e dimë numrin e saktë se sa do të jenë përfitues, pasi kjo do të dihet pasi të aprovohen subvencionimet. Vitin e kaluar kanë qenë rreth 100 mijë qytetarë përfitues të këtij programi».