AKB-ja paralajmëron se rreth 500 vende pune janë në rrezik te fabrika “Vita”

Aleanca Kosovare e Bizneseve ka ngritur shqetësimin se rreth 500 vende pune të përhershme në fabrikën “Vita” rrezikojnë të humbin si pasojë e vendimeve të ndërmarra nga Ministria e Bujqësisë dhe Agjencia e Ushqimit dhe Veterinarisë së Kosovës.

Sipas organizatës, ky rrezik ka lindur pasi prodhuesve vendorë u është ndaluar përdorimi i vajit të palmës në nënproduktet e qumështit, ndërkohë që kjo lëndë u lejohet produkteve të importuara në treg. Në reagimin e publikuar, Aleanca Kosovare e Bizneseve ka kundërshtuar këto masa duke i cilësuar si trajtim jo i barabartë dhe aplikim të standardeve të dyfishta për të njëjtin treg, ku prodhuesi vendor penalizohet kurse importi favorizohet.

Organizata ka shtuar gjithashtu se siguria ushqimore duhet të zbatohet në mënyrë të barabartë për të gjitha llojet e produkteve, qofshin ato vendore apo të importuara nga jashtë. Për më tepër, sipas këtij reagimi, ekziston rreziku që fabrika e qumështit të zhvendoset në dy vende të tjera në rajonin e Ballkanit Perëndimor si dhe më tej në Turqi.

Në këtë situatë, Aleanca Kosovare e Bizneseve kërkon nga Ministria e Bujqësisë dhe Agjencia e Ushqimit dhe Veterinarisë së Kosovës që të ndërmarrin një reagim të menjëhershëm, të sigurojnë trajtim të barabartë dhe të gjejnë një zgjidhje urgjente, në mënyrë që të mos lejohet dëmtimi i prodhimit vendor dhe humbja e qindra vendeve të punës për shkak të vendimeve institucionale.

Në njoftimin e tyre, përfaqësuesit e kësaj organizate kanë shtuar: «Është e papranueshme që prodhuesve vendorë t’u ndalohet përdorimi i vajit të palmës në nënproduktet e qumështit, ndërsa produkteve të importuara t’u lejohet kjo! Pse dy standarde për të njëjtin treg? Pse prodhuesi vendor penalizohet, ndërsa importi favorizohet?»