Gjini: Kosova është në kolaps energjetik dhe importoi 27 milionë euro në shtator

Kosova po përballet me kolaps energjetik dhe importi i energjisë elektrike ka kushtuar 27 milionë euro vetëm gjatë muajit shtator, deklaroi kryetari i Aleancës, Ardian Gjini, të shtunën në një konferencë për media. Ai tha se kërkesa e tejkalon dyfishin e prodhimit vendor dhe akuzoi Lëvizjen Vetëvendosje për shkatërrimin e sistemit energjetik.

Vendi vazhdon të ketë telashe me kapacitetet prodhuese të rrymës elektrike, çka ka detyruar blerjen e energjisë nga jashtë me çmime të larta. Kryeministri Albin Kurti kishte deklaruar vite më parë në Kuvendin e Kosovës se do të rregulloheshin bojlerët dhe filtrat e blloqeve prodhuese. Megjithatë, problemet teknike në bllokun më të madh të prodhimit kanë mbetur të pazgjidhura prej kohësh.

Sipas Gjinit, prodhimi i energjisë elektrike në Kosovë ka rënë në rreth 372 megavat, ndërsa kërkesa në të njëjtat momente ka kaluar nivelin e 800 megavatëve. Kryetari i Aleancës njoftoi se ky hendek i madh po e detyron vendin të importojë të paktën 2 milionë euro energji elektrike në ditë. Ai pretendon se këto shpenzime po paguhen drejtpërdrejt nga xhepat e qytetarëve, si përmes faturave mujore ashtu edhe nga buxheti i shtetit nëpërmjet taksave.

Gjini po ashtu akuzoi Qeverinë se ka dështuar me qëllim tenderin për riparimin e bojlerit, i cili duhej të përfundonte deri në fund të këtij viti. Sipas tij, procedura tenderuese është hapur dhe është mbyllur pa asnjë fitues me qëllim të zbulimit të çmimeve të ofertave, duke e cilësuar këtë si aferë korruptive. Ai deklaroi se pas ankesave të pranuara bojleri ka mbetur i pariparuar dhe se gjatë muajve dhjetor, janar ose shkurt blloku më i madh i prodhimit do të duhet të nxirret sërish nga sistemi për këtë intervenim.

Aleanca do të kërkojë interpelancë me Qeverinë e Kosovës në Kuvend për çështjen e energjisë elektrike në fillim të javës së ardhshme. Gjini shprehu besimin se për këto pështjellime dhe humbje të mëdha financiare do të zhvillohen hetime që mund të zgjasin me vite.

Gjini tha gjithashtu se udhëheqja e sistemit është kthyer në një nyjë të lidhur nga e cila nuk ka dalje. Ai deklaroi: «E kemi prodhimin e energjisë elektrike dikund në 372 megavatë tash, e kërkesën në këto momente e kemi mbi 800 megavatë, në momente kur nuk pritet me pas shumë kërkesë. Që do të thotë se po mbërrijmë minimum me importu 2 milionë euro energji elektrike në ditë. Nuk vijnë këto 2 milionë prej askujt tjetër përpos prej xhepave të qytetarëve të Kosovës». Ai shtoi se «Kosova meriton me pasë qeverisje që e ka në fokus kryesor zhvillimin e vendit, zhvillimin ekonomik, jetën e qytetarit të vet».