Ministria e Financave tenderon eksperte arkitekture për 15,600 euro
Pse po përdoret prokurimi publik për angazhimin e personave fizikë në vend të rekrutimit të rregullt?
PRISHTINË — Ministria e Financave, Punës dhe Transfereve ka lidhur një kontratë 12-mujore përmes tenderit për angazhimin e një eksperte të arkitekturës, në vlerë prej rreth 15,600 euro. Praktika e punësimit nëpër ministri përmes prokurimit publik është bërë e zakonshme në Qeverinë në detyrë.
Tenderi me numër të prokurimit MF 201-26-2449-2-2-1 e ka fituar Albana Bajrami me 85,6 pikë. Dokumenti nuk specifikon formën e vlerësimit të dy kandidateve, as detyrat konkrete të ekspertit — i referohet vetëm Termave të Referencës.
Nuk është bërë e ditur nëse angazhimi lidhet me një projekt specifik apo me mbështetje të përgjithshme profesionale brenda ministrisë. Lajmi.net ka dërguar pyetje për arsyet e këtij tenderimi dhe për detyrat që do të kryejë eksperti gjatë periudhës 12-mujore.
Po ashtu është kërkuar sqarim pse kjo nevojë u mbulua përmes prokurimit publik dhe jo procedurave të rregullta të rekrutimit. Ministria e Financave nuk ka kthyer përgjigje deri në publikim.
Kontratat për persona fizikë përmes prokurimit publik përdoren për shërbime të specializuara, por shpesh ngjallin diskutime për dallimin mes konsulencës dhe punësimit të rregullt. Mungesa e transparencës mbi vlerësimin dhe detyrat e shtyn këtë praktikë në zonën gri të rregulloreve.
Burim: Demokracia
— Redaksia ZHURMA