Komuna e Vitisë shpërndan 47 mekanizma bujqësorë për fermerët

Komuna e Vitisë ka vazhduar programin e mbështetjes për sektorin e bujqësisë duke shpërndarë gjithsej 47 pajisje të reja bujqësore, me qëllim lehtësimin e punëve në terren dhe rritjen e kapaciteteve prodhuese të fermave. Përmes Drejtorisë për Bujqësi, Pylltari dhe Zhvillim Rural, janë shpërndarë 17 rroto kosë dhe 30 freza për traktor, të cilat synojnë modernizimin e veprimtarisë bujqësore dhe përmirësimin e kushteve të punës për prodhuesit vendorë.

Kryetari i Komunës së Vitisë, Sokol Haliti, theksoi se mbështetja e fermerëve mbetet një nga prioritetet e qeverisjes komunale dhe se investimet në këtë sektor do të vazhdojnë edhe në periudhën e ardhshme. Ai nënvizoi se përzgjedhja e mekanizmave që do të shpërndahen në vazhdimësi do të bëhet duke marrë parasysh kërkesat dhe nevojat konkrete të fermerëve. Ndërkaq, drejtori për Bujqësi, Pylltari dhe Zhvillim Rural, Naim Pira, vlerësoi se drejtoria do të vazhdojë zbatimin e programeve mbështetëse për ata që merren me kultivimin e kulturave të ndryshme bujqësore.